உயிரைப் பறிக்கும் முடிவுகளை எடுப்பதில் மனிதர்களுக்குப் பதிலாக செயற்கை நுண்ணறிவு (AI) செயல்படலாம் என்ற அதிரடித் தகவல் வெளியாகியுள்ளது.
சாக வேண்டுமா? AI முடிவு செய்யும்! ‘தற்கொலை மெஷின்’ கண்டுபிடிப்பாளரின் அடுத்த அதிரடி – உலகையே உலுக்கும் புதிய சர்ச்சை!
உலகளவில் ‘டாக்டர் டெத்’ (Dr. Death) என்று அழைக்கப்படும் ஆஸ்திரேலிய கருணைக்கொலை ஆதரவாளர் பிலிப் நிட்ஸ்கே, தற்போது ஒரு புதிய அதிர்ச்சிகரமான திட்டத்தை முன்வைத்துள்ளார். ஒரு நபர் தனது உயிரை மாய்த்துக்கொள்ளும் ‘கருணைக்கொலை’ (Assisted Dying) முடிவை எடுப்பதற்குத் தேவையான மன முதிர்ச்சி மற்றும் தகுதி அவரிடம் இருக்கிறதா என்பதைத் தீர்மானிக்க, இனி மருத்துவர்களுக்குப் பதிலாக செயற்கை நுண்ணறிவைப் (AI) பயன்படுத்தலாம் என அவர் தெரிவித்துள்ளார். உயிரும் மரணமும் சம்பந்தப்பட்ட ஒரு மிக முக்கியமான முடிவை மென்பொருளிடம் ஒப்படைப்பது சரியா என்ற விவாதம் தற்போது உலகளவில் வெடித்துள்ளது.
கடந்த 2021-ஆம் ஆண்டு சுவிட்சர்லாந்தில் அறிமுகப்படுத்தப்பட்ட ‘சார்க்கோ’ (Sarco) எனப்படும் தற்கொலை பாட் (Suicide Pod) மூலம் பிலிப் நிட்ஸ்கே உலகப் புகழ்பெற்றார். இந்த இயந்திரத்திற்குள் சென்று ஒரு பொத்தானை அழுத்தினால், ஆக்சிஜன் அளவு குறைக்கப்பட்டு ஒரு நிமிடத்திற்குள் வலியற்ற மரணம் நிகழும். தற்போது, இந்த இயந்திரத்திற்குள் நுழைவதற்கான அனுமதியை வழங்குவதற்கும், அந்த நபரின் மனநிலையை ஆய்வு செய்வதற்கும் AI தொழில்நுட்பத்தை இணைக்க அவர் திட்டமிட்டுள்ளார். இது மருத்துவர்களின் பணியை எளிதாக்கும் என்பது அவரது வாதம்.
பொதுவாக கருணைக்கொலை செய்ய விரும்பும் ஒரு நபர், அதற்கான மனத்திறன் (Mental Capacity) பெற்றுள்ளாரா என்பதை இரண்டு மனநல மருத்துவர்கள் ஆய்வு செய்து சான்றளிக்க வேண்டும். ஆனால், மருத்துவர்கள் தங்கள் சொந்த மத அல்லது தார்மீக நம்பிக்கைகளின் அடிப்படையில் ஒருவருக்கு அனுமதி மறுக்கக்கூடும் என நிட்ஸ்கே கருதுகிறார். ஆனால் AI அல்காரிதம்கள் எந்தவித சார்பும் (Bias) இன்றி, அந்த நபரின் உரையாடல் மற்றும் பதில்களை வைத்து ஒரு புறநிலை முடிவை (Objective decision) எடுக்கும் என அவர் வாதிடுகிறார்.
இந்தத் திட்டம் மருத்துவ மற்றும் அறநெறி சார்ந்த சமூகத்தினரிடையே கடும் கொந்தளிப்பை ஏற்படுத்தியுள்ளது. ஒரு கணினி மென்பொருள் எவ்வாறு மனித உணர்வுகளையும், வாழ்வின் மதிப்பையும் உணர்ந்து மரண தண்டனை போன்ற ஒரு முடிவை எடுக்க முடியும் எனப் பலரும் கேள்வி எழுப்புகின்றனர். “தொழில்நுட்பக் கோளாறு ஏற்பட்டாலோ அல்லது ஹேக்கர்கள் ஊடுருவினாலோ தேவையில்லாத மரணங்கள் நிகழ வாய்ப்புள்ளது” என்று தொழில்நுட்ப வல்லுநர்கள் எச்சரிக்கின்றனர். மனித உயிரைத் துச்சமாக மதிக்கும் ஒரு போக்கை இது உருவாக்கும் என அவர்கள் அஞ்சுகின்றனர்.
தற்போது சுவிட்சர்லாந்து போன்ற நாடுகளில் இந்த சார்க்கோ பாட்களின் பயன்பாடு குறித்துக் கடுமையான சட்டப் போராட்டங்கள் நடந்து வருகின்றன. சமீபத்தில் ஒரு அமெரிக்கப் பெண் இந்த மெஷினைப் பயன்படுத்தி உயிரிழந்ததைத் தொடர்ந்து, இதன் உரிமையாளர்கள் மீது சட்ட நடவடிக்கை எடுக்கப்பட்டது. இத்தகைய சூழலில், ‘AI மருத்துவர்’ என்ற புதிய யோசனை சர்வதேச அளவில் பெரும் அதிர்வலைகளை ஏற்படுத்தியுள்ளது. மனிதகுலத்தின் கடைசி எல்லையான மரணத்திலும் தொழில்நுட்பம் ஆதிக்கம் செலுத்தத் தொடங்குவது எதிர்காலத்தைப் பற்றிய பெரும் அச்சத்தை விதைத்துள்ளது.